Նյութը՝ Հրաչուհի Ալմաստյանի
Լուսանկարները՝ Արմեն Սիմոնյանի
Տեղադրվել է 31-10-2018
«Այս անգամ էլ փիլիսոփայում եմ երգերի միջոցով». Ալեքսանդր Պլատո
«Միշտ փիլիսոփայում եմ, դա իմ մասնագիտությունն է: Այս անգամ էլ փիլիսոփայում եմ երգերի միջոցով,- Ալեքսանդր Պլատոն կարճ, բայց բովանդակալից ներկայացնում է փիլիսոփայությունից երգարվեստ իր ճանապարհը,- մի օր բարձրացա բեմ եւ հասկացա, որ գտնում եմ իմ կարեւոր մի ես-ը, որը շատ սոված էր եւ վաղուց չէր կենակցել երաժշտությանը»:

Երաժշտական դպրոց ավարտել էր, սակայն երաժշտությամբ երբեւէ չէր զբաղվել: 30 տարեկանին մոտ հետադարձ հայացք նետելով անցած ճանապարհին՝ հասկանում է, որ դժգոհ է. «Ինձ մոտ տարիքային ճգնաժամ էր սկսվել, ամեն ինչից դժգոհ էի, ինձ արդեն սկսել էր գրավել երաժշտությունը»:

Այդ օրվանից 5 տարի է անցել, առանց երաժշտության գուցե իր կարեւոր ես-ն այդպես էլ քաղցած մնար, սակայն երկարատեւ աշխատանքների շնորհիվ ոչ միայն բեմում է, այլեւ հանդիսատեսի դատին ներկայացրեց իր առաջին՝ «My BaRock» ձայնասկավառակը, որի շնորհանդեսը հոկտեմբերի 30-ին տեղի ունեցավ «ԿԱՄԻ» երաժշտական ակումբում:

Ձայնասկավառակում 7 երգ է ներառված, որոնց մեծ մասի երաժշտության հեղինակը դաշնակահար Հայկ Մելիքյանն է, երաժշտություն է գրել նաեւ Զառա Պետրոսյանը:

«Այս սկավառակն իմ երկու կողմերի միասնությունն է: Շատ եմ սիրում ռոք եւ դասական երաժշտություն, միացրինք իրար, ստացվեց «BaRock»: Այնտեղ շատ մտորումներ կան»,- ասում է Ալեքսանդր Պլատոն։
Երեկոն ուղեկցվեց Ալեքսանդր Պլատոյի «My BaRock» խորագրով մենահամերգով: Հատուկ հյուրերն էին երգչուհիներ Մարինե Հակոբյանը (Մարբին), Սյուզաննա Մելքոնյանը, Աննա Դանիելյանը, որոնց հետ համերգի ընթացքում Պլատոն ներկայացավ նաեւ զուգերգերով:

Նշենք, որ Ալեքսանդր Պլատոն ձայնագրել է շուրջ 15 երգ, մասնակցել երկու միջազգային մրցույթների: 2015 թ.-ին Բուլղարիայի Վառնա քաղաքում կայացած «Discovery» երաժշտական փառատոնին արժանացել է հատուկ մրցանակի: 2016 թ. VAN Music Awards-ի կողմից ճանաչվել է «Տարվա բացահայտում» նոմինացիայի հաղթող: Դրան հաջորդել է նրա հեղինակային գրքի հրատարակումը՝ «Ամեոբայի շուն»-ը խորագրով:

Պատկերասրահ՝ Ալեքսանդր Պլատոյի «My BaRock» մենահամերգը