Նյութը՝ Աստղիկ Համբարձումյանի
Լուսանկարները՝ Աստղիկ Միրաքյանի
Տեղադրվել է 27-02-2018
Հայկական բրենդը ներկայացվել է փարիզյան հեղինակավոր ցուցահանդեսին
«Alexis Accessories» ապրանքանիշի հեղինակ, նկարիչ-մոդելավորող Արմինե Գեւորգյանն օրեր առաջ Փարիզում մասնակցել է ոլորտի ամենահեղինակավոր եվրոպական ցուցահանդեսներից մեկին՝ «BIJORHCA»-ին։

«BIJORHCA»-ն անցկացվում է տարին երկու անգամ՝ B2B ֆորմատով, ինչի արդյունքում աքսեսուարների հեղինակներն անցնում են նախնական ընտրության փուլ եւ հայտնվում բազմապլատֆորմ ցուցահանդեսին։
13,000-ից այցելուների հիմնական մասը գնորդներն են, ովքեր ներկայացնում են տարբեր երկրների նորաձեւության տներ, մասնագիտական խանութ-սրահներ եւ հավաքածուներ։

Արմինե Գեւորգյանը Փարիզում ներկայացել է 17 աշխատանքներով, որոնք ընդգրկվել են ցուցահանդեսի ամենահեղինակավոր հատվածում՝ trend zone-ում։ Արմինեն հաջող բանակցությունների արդյունքում գործնական կապեր է հաստատել Ֆրանսիայի, Պորտուգալիայի, Բրազիլիայի եւ Իտալիայի ներկայացուցիչների հետ։

«Alexis Accessories» աքսեսուարները ձեռքի յուրօրինակ աշխատանքներ են, որոնք շուկա են դուրս գալիս որպես էքսկլյուզիվ նմուշներ։ Հիմնական աշխատանքային նյութը հայելին եւ վիտրաժային ապակին են: Վերջինս իր փխրունության եւ նուրբ աշխատանք պահանջող «բնավորությամբ» զարդին հաղորդում է անզուգական տեսք եւ անկրկնելիություն։

«Alexis Accessories» զարդերը կրում են Նադեժդա Բաբկինան, Անժելիկա Վարումը, Ալեքսանդր Բույնովը, Նազենի Հովհաննիսյանը, Լուսինե Բադալյանը, Կարինե Խոդիկյանը, Շուշանիկ Արեւշատյանը, մշակույթի, շոու բիզնեսի, բժշկական ոլորտի այլ հայտնի ներկայացուցիչներ։

«ORCHID» նոր հավաքածուն կներկայացվի մարտին։